२०८३ अषाढ २१, आईतबार
सार्वजनिक गाडीमा यात्रीको साथबाट सात हजार डलर भन्दा बढी चोरी गर्ने तीनजनालाई प्रहरीले पक्राउ गरेको छ । उक्त डलर सटही गरिदिने थप एक जनालाई पनि प्रहरीले पक्राउ गरेको जनाएको छ ।
ललितपुर महानगर-१७ ग्वार्कोमा सार्वजनिक सवारीसाधनमा यात्रा गरिरहेका विष्णु अधिकारीको झोलाबाट सात हजार ४७ अमेरिकी डलर चोरी गर्ने तीन जनालाई प्रहरीले पक्राउ गरेको हो । पक्राउ पर्नेमा सिन्धुपाल्चोक इन्द्रावती-६ घर भई हाल भक्तपुर ठिमी बस्ने ३१ वर्षीय सञ्जिव तामाङ, पर्सा ठोरी-५ घर भई फर्पिङ बस्ने ३३ वर्षीय आइतमान तामाङ र सिन्धुपाल्चोक लिसंखुपाखर-३ घर भई ललितपुर इमाडोल बस्ने २१ वर्षीया सविना तामाङ रहेका छन् ।
उनीहरुलाई ग्वार्कोबाटै २ लाख रुपैयाँ र मोबाइलहरू सहित प्रहरीले नियन्त्रणमा लिएको हो । साथै चोरीको डलर साटिदिएको आरोपमा ललितपुरको वकुबहालस्थित महाबुद्ध मनि एक्सचेन्जकी ५८ वर्षीया मङ्गल लक्ष्मी श्रेष्ठलाई पनि प्रहरीले पक्राउ गरेको छ । उनका साथबाट एक सय डलर बराबरका २८ नोट पनि बरामद गरेको प्रहरीले जनाएको छ ।
उनीहरुलाई चोरी सम्बन्धी कसुरमा थप आवश्यक कारवाहीको लागि जिल्ला प्रहरी परिसर जावलाखेल ललितपुरमा पठाईएको प्रहरी उपरीक्षक रविन्द्र रेग्मीले जानकारी दिए ।
