nepal ahile circle final NEW

गन्धर्व नाटकघरमा ‘१२ दुर्वासा’ मञ्चन जारी, परिवर्तनको अभिनयमा पुनरागमन

‘१२ दुर्वासा’ नाटक मञ्चन सुरु, सकारात्मक प्रतिक्रियाले कलाकार उत्साहित

राजाराम पौडेल, पोखरा । नाटक ‘१२ दुर्वासा’ को मञ्चन जारी रहेको छ । गत पौष २६ गतेबाट पोखरा थिएटरको गन्धर्व नाटकघरमा मञ्चन सुरु भएको नाटकले नाटकप्रेमीको माया पाइरहेको छ । यस अगाडि मञ्चन भएका नाटक भन्दा केही फरक स्वाद यो नाटक मार्फत पस्कने खोजेको कारण नाटक हेर्ने दर्शकले सकारात्मक प्रतिक्रिया दिइरहेको पोखरा थिएटरले जनाएको छ ।

दर्शकले मात्र नभएर नाटकमा अभिनय गरेका कलाकार समेत भिन्न विषयवस्तुको नाटकमा काम गर्न पाएकोमा उत्साहित छन् । उनीहरूको जोशका कारण दिनप्रतिदिन नाटकमा निखारता थपिदै गएको पोखरा थिएटरका संस्थापक सदस्य दीलप्रसाद गुरुङले बताए । नाटकपारखीलाई नाटक हेरेर प्रतिक्रिया दिन उनले आग्रह समेत गरेका छन् ।

परिवर्तनको निर्देशनमा तयार भएको नाटकमा उनी सहित १३ जना कलाकारले अभिनय गरेका छन् । यसरी अभिनय गर्नेमा रमेश बाबु तिमल्सिना, अनुषा परियार, रविन्द्र मल्ल, सुसन पौडेल, रोशनी रामदाम, धनकाजी श्रेष्ठ, अञ्जु दाहाल, गोपाल भुषाल, राजेन्द्र अधिकारी, मनोज अदित्य, दिप्सना विश्वकर्मा र रोहित पौडेल रहेका छन् ।

अमेरिकन नाटककार रेग्नाल्ड रोजले लेखेको यस नाटकको नेपाली अनुवाद सुरेश सापकोटाले गरेका छन् । यो नाटकको लागि पोखरा थिएटरको गन्धर्व नाटकघरमा ‘ट्राभर्स स्टेज’ निर्माण गरिएको छ । यस्तो स्टेजको प्रयोग गन्धर्व नाटकघरमा पहिलो भएकोलले दर्शकले नौलो अनुभव समेत गर्न पाउनेछन् ।

‘टुबेल एङ्ग्री म्यान’को नेपाली रुपान्तरण रहेको नाटकमा छोराले बुबालाई मारेको हो होइन भन्ने विषयमा केन्द्रीत रहेको छ । यो विषयमा अदालतलाई निर्णय गर्न गाह्रो भएपछि फरक–फरक पृष्ठभूमिका १२ जनालाई छलफल गरी निर्णय गर्न लगाइन्छ । उनीहरुको विचारमा देखिने विविधता र सर्घष नै नाटकको विषयवस्तु हो । यसलाई प्रभावकारी बनाउन कलाकारले गरेको अभिनयात्मक बहस तारिफयोग्य छ ।

सन् २०५४ मा टेलि प्ले (टेलिभिजन सिरिज) का रुपमा रेग्नाल्डले यो नाटक लेखेका थिए । पछि सन् १९५७ मा फिल्म निर्माण भयो । त्यसपछि यो विश्वव्यापी रुपमा झनै चर्चित बन्यो । विश्वका विभिन्न भाषामा यसको फिल्म नाटक निर्माण भएका छन् ।

माघ १३ गतेसम्म मञ्चन हुने यो नाटकले वर्गीय,जातिय, क्षेत्रिय, लैङ्गीक समाजको चित्रण गर्ने भएकोले नाटकप्रेमीको ध्यान खिच्ने अपेक्षा गरिएको छ ।

लगातार विद्यार्थी केन्द्रीत नाटक मञ्चन भइरहेकोसमयमा त्यसभन्दा भिन्न खालको स्वाद पस्कनको लागि यो नाटक मञ्चन गरिएको र यसबाट दर्शकको माया पाइरहेको नाटकका निर्देशक समेत रहेका पोखरा थिएटरका अध्यक्ष परिवर्तनले बताए । यो नाटकबाट उनी अभिनयको क्षेत्रमा समेत पुनः फर्किएका छन् । पोखरा थिएटरको स्थापना अगाडि केही नाटकमा अभिनय गरेका उनले पछिल्लो समयमा व्यवस्थापन र निर्देशनको क्षेत्रमा आफूलाई व्यस्त बनाएका थिए ।  यो नाटकमा भिन्न गेटअपमा मञ्चमा देखिएका उनले नाटकलाई परिपक्कता प्रदान गर्न निकै मेहनत गरेका छन् ।

‘यो नाटकबाट म पनि पुनः अभिनयको क्षेत्रमा फर्किएको छु, एक पटक हेरेर प्रतिक्रिया दिनुहोला’ उनले भने ।

१ घण्टा ४० मिनेट हाराहारीको यो नाटक प्रचार–प्रसार र व्यस्थापनका लागि बजार प्रबन्धक प्रकाश पराजुली र लेखा हेर्ने शुभेक्क्षा शर्माले काम गरिरहेका छन् । मिलन क्षेष्ठ, रञ्जु दाहाल, विकास अधिकारी, प्रथम श्रेष्ठ, अनिशा खरेल लगायतले व्याक स्टेजमा रहेर साथ दिएका छन् ।

नाटक बुधबार बाहेक हरेक दिन साँझ ४:४५ बजे शनिबार र आइतबार अतिरिक्त शो को रुपमा दिउँसो १ बजेसमेत नाटक मञ्चन हुने पोखरा थिएटरका संस्थापक सदस्य गुरुङले जनाए ।

प्रतिक्रिया/सेयर

थप खबर

यो पनि पढनुहोस्