काठमाडौं । जिल्ला प्रशासन बाँकेले जाजरकोटमा भएको भूकम्प प्रभावित मानिसहरुको उपचारका लागि स्थानीय अस्पतालहरु र रक्तदातालाई तयारी अवस्थामा रहने प्रवन्ध गरेको जनाएको छ।
प्रमुख जिल्ला अधिकारी श्रवण कुमार पोखरेलले भूकम्पका गंभीर घाईतेको उपचारका लागि बाँके प्रशासनबाट बिहान ३.२१ बजेबाटै तयारी थालिएको जानकारी दिएका छन् ।
भेरी अस्पताल नेपालगन्जलाई उपचारको लागि मुख्य केन्द्र अस्पताल तोकिएको भने ब्यक्तिगत पहलमा उपचारका लागि आउने घाइतेहरुको आफन्तजनको सहजताको लागि पनि नरेश श्रेष्ठलाई सम्पर्क व्यक्ति तोकिएको छ । उनको सम्पर्क नम्बर ९८५११४३६६६ मा सम्पर्क गर्न भनिएको छ ।
कोहलपुर मेडिकल कलेजलाई तयारी अवस्थामा राखिएको छ भने नीजि अस्पतालहरुलाई पनि तयारी रहन भनिएको प्रमुख जिल्ला अधिकारी पोखरेलले जानकारी दिएका छन्।
त्यसैगरी भेरी अस्पताल, सैनिक असपताल र प्रहरी अस्पतालको १०५ वटा बेड तयारी अवस्थामा राखिएको छ भने कोहलपुर मेडिकल कलेजलाई पनि तयारी अवस्थामा राखिएको जनाईएको छ ।
अस्पतालहरुमा पर्याप्तमात्रामा डाक्टर, नर्शिङ स्टाफ र लजिस्टिकको प्रबन्ध मिलाईएको जनाईएको छ ।
साथै हेलिकप्टरबाट आउने बिरामीको लागि राँझा बिमानस्थल र सेनाकोे हेलिप्याडमा २/२ वटा एम्बुलेन्स तैनाथ गरिएको छ ।
त्यसैगरी ब्लडको मौज्दात रहेको छ भने अपुग भएमा फ्रेश ब्लड आपूर्तिको लागि रक्तदाता सुरक्षाकर्मीको ब्यवस्था समेत मिलाईएको जनाईएको छ ।
