काठमाडौं । मुगु जिल्लाको सदरमुकाम गमगढी बजारमा भीषण आगलागी भएको छ ।
मुगुको छायाँनाथ रारा नगरपालिका वडा नं २ मा पर्ने गमगढी बजारको कालीकामालीका मन्दिरको पश्चिमी क्षेत्रतिर शुक्रवार राती अन्दाजी १२ बजे आगलागी हुदाँ आठ घर जलेर नष्ट भएका छन् ।
जिल्ला प्रहरी कार्यालयको जानकारी अनुसार उक्त आगलागीबाट जलेका घर धनीहरूको नाम तार्के लामा, सोनाम लामा, जङ्ग बहादुर ऐडी, सान्तोना खत्री, पन्च सेजुवाल, प्रदीप रावल, पुतली शाही पद्मराज मल्लको टिनको टहरा रहेका छन् ।
स्थानीय चुम्म बुढाका अनुसार उक्त घरका सटरहरूमा रहेको व्यापारिक मालसामानहरूका साथै घरका अन्य माल सामान गरी करोडौँको क्षती हुन सक्ने अनुमान गरिएको छ । आगो नियन्त्रणका लागि नेपाल प्रहरी,सशस्त्र प्रहरी,नेपाली सेना,नगर प्रहरी र स्थानीय बासिन्दाहरू खटिएका छन् । गमगढी खानेपानीको पानी प्रयोग गरी आगो नियन्त्रणमा आएको थियो ।
आगो के कसरी लाग्यो हो भन्ने कुराको जानकारी प्राप्त हुन सकेको छैन भने क्षतिको यकिन विवरण आउन बाँकिनै रहेको जिल्ला प्रहरी कार्यालयका प्रहरी नायव उपरीक्षक राम बहादुर थापाले बताए ।
रातिको समयमा आगलागी भए पनि कुनै मानविय क्षति हुन पाएन हाल आगलागी नियन्त्रणमा आएको छ । आगलागी पीडितहरुको रहातकोलागि तत्काल व्यावस्था छायानाथ रारा नगरपालिकाबाट गर्ने र अन्य निकायसँग राहातको लागि पहल गरिने नगर प्रमुख बिस्नु कुमार भामले बताएका छन् ।
