नर्सिङ काउन्सिलको प्रश्नपत्र लिक गरेको आरोपमा तीन युवती पक्राउ परेका छन् ।
पक्राउ पर्नेमा धादिङकी २३ वर्षीया सबिना आलेमगर तथा पोखराका २० वर्षीया भावना गुरुङ र समीक्षा थापा रहेका छन् । प्रहरीका अनुसार पोखराको अलब्राइट ईन्स्टिच्युटका उनीहरुले परीक्षाको प्रश्नपत्र ईन्स्टिच्युटको मेसेन्जर ग्रुपमा पठाएका थिए । उताबाट उत्तर आएपछि सोही उत्तर उनीहरुले सारेर परीक्षा दिएको प्रहरीले जनाएको छ ।
उनीहरुसँगै अल ब्राइट इन्स्टिच्यूटका गाडी चालक तनहुँ घर भएका ५० वर्षीय चिजकुमार श्रेष्ठलाई पनि प्रहरीले नियन्त्रणमा लिएको थियो । श्रेष्ठले उनीहरुलाई पोखराबाट लिएर आएको जनाइएको छ तर उनको चिट चोर्न भूमिका नदेखिएपछि बोलाएको बेलामा उपस्थित हुनेगरी रिहा गरिएको छ ।
घटनाबारे थप अनुसन्धान भइरहेको प्रहरीले जनाएको छ । उक्त परीक्षामा करिब १२ सय विद्यार्थी सामेल रहेको जनाइएको छ ।
