पोखरा महानगरमा घर भाडासहितका करमा छुटै छुट, पार्किङ निःशुल्क, विज्ञापन कर नलिने !

२७ असार, पोखरा । पोखरा महानगरका मेयर धनराज आचार्यले महानगरले उल्लेख्य रूपमा करको दर घटाउन लागेको बताउनुभएको छ । नागरिकहरूको राय सल्लाह र सुझावलाई लिएर महानगरले संकलन गर्दै आएको सम्पति कर, व्यवसाय कर, घर भाडा कर लगायतका कर घटाइएको बताउनुभएको हो । हिजोमात्र पारित भएको  नयाँ बजेटका सन्दर्भलाई लिएर पोखरा महानगरले सोमबार राखेको पत्रकार सम्मेलनमा बोल्दै मेयर आचार्यले साउन १ गतेबाट लागू हुने गरी महानगरले नागरिकहरूको चासोको विषयका करहरू घटाएको जानकारी दिनुभयो ।

‘ .. हामीले नागरिकको चासोको विषय रहेका महत्त्वपूर्ण क्षेत्रको करको दरहरूलाई घटाएका छौँ । सम्पति करलाई विगतमा भन्दा हामीले घटाएका छौँ, व्यवसाय करलाई घटाएका छौँ, घर बहाल कर धेरै नै घटाएका छौँ’, मेयर आचार्यले भन्नुभयो । उहाँले घर भाडामा बस्ने व्यक्तिको हकमा ३ प्रतिशत, व्यवसायको हकमा ५ प्रतिशत र लिमिटेड कम्पनीको हकमा ७ प्रतिशत घर बहाल कर निर्धारण गरिएको बताउनुभयो । अन्य करको हकमा समय अनुकूल हुने गरी निर्धारण गरिएको र  त्यो छिटै नै महानगरले सार्वजनिक गर्ने  उहाँले बताउनुभयो ।

मेयर आचार्यले पार्किङको विषयमा धेरै नै गुनासो आएकोले चालु अवस्थामा रहेको पार्किङको ठेक्का समय सकिएपछि नि:शुल्क गरिने बताउनुभयो । लिमिटेड कम्पनी र कानुनले व्यवस्था गरेको होर्डिङ बोर्ड बाहेक व्यक्ति र पसल व्यवसायले व्यवसायको प्रवर्धन गर्न राखेका बोर्डमा विज्ञापन कर नलिने गरी संशोधन गरिएको मेयर आचार्य ले बताउनुभयो ।

पोखरा क्षेत्रमा अन्डरग्राउन्ड पार्किङ गर्ने गरी निर्माण गरिएका घरहरूमा पार्किङ नभई गोदाम र व्यवसाय सञ्चालन गर्ने गरेको भन्ने गुनासो सुनिँदै आएकाले त्यस्ता घरका धनीलाई निश्चित समय तोकेर पार्किङ गर्ने व्यवस्था मिलाउन निर्देशन दिने बताउनुभयो ।

उहाँले महानगरले करको दर घटाएर दायरा फराकिलो बनाउन लागेको बताउनुभयो । पोखरामा निर्धारित मापदण्ड भन्दा बढी तला हुने गरी निर्माण भइसकेका घरहरूलाई करको दायरामा ल्याइने र मापदण्ड माथिका तला अनुसार कर संकलन गरिने बताउनुभयो ।

‘पोखरामा यस अगावै घर निर्माण गरी सम्पन्न नलिएका घरहरूको हकमा त्यस्ता घरका माथिल्लो तला काटेर फाल्न सक्ने सामर्थ्य महानगरसँग हाल छैन’, ‘मेयर आचार्यले भन्नुभयो हामीले त्यस्ता घर तथा भवनलाई कानुनी रूपमा दायरामा ल्याएर उच्च कर निर्धारण गरी कर संकलन गर्नेछौँ ।’

मेयर आचार्यले साउन १ गतेबाट बल्ल महानगरमा देखिने गरी काम हुने दाबी गर्नुभयो । हाल आर्थिक वर्ष अन्तिम चरणमा रहेकाले ठूला काम गर्न बजेट अभाव रहेको बताउँदै ठुला र देखिने काम साउन १ गतेबाट हुने बताउनुभएको हो । ‘‘हाम्रो पहिलो काम भनेको डाटा कलेक्सन हो, अहिले त्यसमा काम गरिरहेका छौँ । देखिने गरी साउन १ गतेबाट काम हुन्छ’, मेयर आचार्यले भन्नुभयो ।’

महानगरले आर्थिक वर्ष ०७९/८० का लागि ८ अर्ब ७७ करोड रुपैयाँ बराबरको बजेट ल्याएको छ । अघिल्लो पटकभन्दा करिब साढे २ अर्ब बजेट बढी ल्याएको महानगरले करको दर भने उल्लेख्य रूपमा घटाएको जनाएको छ ।