काठमाडौं । नेपाली कांग्रेसको काठमाडौं महानगर समितिले मेयरको उम्मेदवारका लागि पाँचजनाको नाम सिफारिस गरेको छ।
महानगर समितिले कांग्रेस नेता प्रकाशमान सिंह पत्नी सिर्जना सिंहसहित नीलकाजी शाक्य, हरिप्रभा खड्गी श्रेष्ठ, सुसन वैद्य, प्रगतिमान रञ्जितको नाम बागमती प्रदेश समितिमा सिफारिस गरेको हो।
सत्ता गठबन्धनमा काठमाडौं महानगरको मेयर कांग्रेसलाई र उपमेयर एकीकृत समाजवादीले पाउने सहमति भएको छ।
तर कांग्रेसले उपप्रमुखमा सुशीला ढकाल र प्रा.डा. अमिता प्रधान शाक्यको नाम सिफारिस गरेको छ।
समितिले एक नम्बरमा वडाध्यक्षसमेत रहेका शाक्य, दोस्रो नम्बरमा सिंह, तेस्रो नम्बरमा काठमाडौंकी उपमेयर खड्गी, चौथो नम्बरमा वैद्य र पाँचौं नम्बरमा रञ्जितको नाम सिफारिस गरेको छ ।
तर, काठमाडौं मेयरका लागि चर्चामा रहनु भएका तीर्थराम डंगोलको नाम सिफारिससमेत गरिएन ।
पूर्वमन्त्रीसमेत रहनुभएका डंगोल संस्थापन पक्षका नेता हुनुहुन्छ ।
सोही कारण महानगर समिति सभापति शाक्यले उहाँको नाम सिफारिसमा नगरेको कांग्रेस काठमाडौंका एक नेताले बताए ।
सिफारिस हुनुभएका रञ्जितबाहेक चारैजना प्रकाशमान सिंह निकट नेता हुनुहुन्छ।
कांग्रेसबाट काठमाडौं मेयरमा सिर्जना सिंह उम्मेदवार बन्ने निश्चित रहेको नेताहरू बताउँछन् ।
