विराटनगर । कोशी प्रदेशसभाको बैठक सुरु भएको छ । मुख्यमन्त्री केदार कार्कीले विश्वासको मत लिने प्रयोजनका लागि बोलाइएको बैठक निर्धारित समयभन्दा करिब दुई घण्टा ढिलो गरी सुरु भएको हो ।
संविधानको धारा १६८ को उपधारा ५ अनुसार शनिबार नेकपा एमालेका ३९ र कांग्रेसका ८ सांसदको समर्थनमा कार्की मुख्यमन्त्री बनेका हुन् ।
माओवादीलाई सरकारको नेतृत्व दिने गठबन्धनका शीर्ष नेताहरूको सहमतिप्रति असन्तुष्टि जनाउँदै ‘विद्रोह’ गरी शेखर कोइराला समूहका कार्की एमालेको सहयोगमा मुुख्यमन्त्री बनेका हुन् ।
कार्कीले नेकपा एमालेका रामबहादुर राना र कांग्रेसका शमशेर राईलाई बिना विभागीय मन्त्रीमा नियुक्त गरेका छन् ।
मुख्यमन्त्री कार्कीलाई नेपाली कांग्रेस, नेकपा एमाले, नेकपा माओवादी, नेकपा एकीकृत समाजवादीले विश्वासको मत दिने भएका छन् ।
प्रदेशमा ६ सिट रहेको राप्रपाले भने सरकारलाई विश्वासको मत नदिने र आफू प्रमुख प्रतिपक्षी भएर बस्ने जनाएको छ ।
कोशी प्रदेशसभामा एमालेका उपसभामुखसहित ४०, कांग्रेसका २९, माओवादीका १३, राप्रपाका ६, नेकपा एकीकृत समाजवादीका ४ तथा जनता समाजवादी पार्टी, जसपाका एकजना सांसद छन् ।
