काठमाडौं । काठमाडौंबाट पोखरा हुँदै बेनीका लागी छुटेको बस पृथ्वी राजमार्गको गजुरी –२ नजिकै चालिसेबाट त्रिशुली नदीमा खसेको छ ।
बुधबार बिहान सवा ११ बजे भएको दुर्घटनामा परेर ८ जनाको घटनास्थलमै मृत्यु भएको छ । प्रहरीले घटनास्थलबाट १७ जनाको उद्दार गरेको छ ।
दुर्घटनामा परी मृत्यु भएका तथा घाइते भएकाको परिचय खुल्न बाँकी छ । उद्धार गरिएका १७ जनामध्ये १३ जनाको थप उपचारका लागि काठमाडौं लगिएको जिल्ला प्रहरी कार्यालय धादिङका सूचना अधिकारी डिएसपी सन्तु जयसवालले जानकारी दिए । थप चार जना घाइतेको धादिङकै राजमार्ग अस्पतालमा उपचार भइरहेको छ ।
जयसवालका अनुसार मृत्यु हुनेमा दुई महिला र ६ जना पुरुष छन् । दुर्घटनाबारे थप अनुसन्धान भैरहेको छ ।
प्रदेश ३-०१-००५ ख ९९५२ नम्बरको यात्रुवाहक बस दुर्घटनामा परेको हो ।
प्रहरीले बसमा सवार यात्रुको घटनाबारे विस्तृत आउन बाँकी रहेकोले त्रिशुलीमा उद्दार कार्य जारी राखेको जनाएको छ ।
